Die Weskus se blomseisoen begin elke jaar rondom Augustus en strek dikwels tot diep in September. Sommige veldblomme kan so vroeg as Julie oopmaak en kan so laat as Oktober oop bly – dit is baie afhanklik van die tydsberekening van winter- en lentereëns en die heersende weerstoestande, en wissel van plek tot plek.
Jacobsbaai is in die middel van die Kaapse Weskus-biosfeer wat noordwaarts strek vanaf Dieprivier in Kaapstad tot by die Bergrivier, en uit 378,000 hektaar kusvlaktes beslaan. Die Biosfeer bevorder ‘n gebalanseerde benadering tot die ontwikkeling van mense en die behoud van biodiversiteit in ‘n bepaalde streek.
Kontak Paul Mare op WhatsApp +49 151 4406-3404 vir betowerende toere van die lenteblomme in ons area in die maande Augustus – Oktober.
Weskus Nasionale Park
Die park lê net suid van Jacobsbaai, tussen die Atlantiese Oseaan in die weste en die R27 kusweg in die ooste, tussen Langebaan se strandmeer in die noorde tot by Yzerfontein in die suide.
Die park is veral bekend vir die duisende trekvoëls wat ‘n belangrike deel van die bewaring is, maar die jaarlikse lenteblomme is ook ‘n groot trekpleister.
Die park bestaan uit verskeie soorte habitatte — insluitende die Langebaan-fynbos en strandmeer — wat verantwoordelik is vir ‘n groot verskeidenheid flora en fauna in en rondom die park. Die maande Augustus en September ontpop met die jaarlikse lenteblomme, veral in die Postberg-blomreservaat-gedeelte van die park.
Gedurende die lenteblomseisoen kan groot velde van bloeiende wit reënmadeliefies (Dimorphotheca pluvialis), Gousblomme (Arctotis hirsuta), Magrietjies (Ursinia anthemoides), Livingstone-madeliefies (Dorotheanthus bellidiformis), en Wildesurings (Oxalis pes-caprae) gesien word.
